ماسكات طبعية من مطبخك جامده جداااااااااا

أكيد بشرتك في الصيف بتعاني من مشاكل كتير أوي زي مثلا مشكلة جفاف البشرة أو ظهور البقع السوداء، علشان كده فكرت النهارده أقدم لكم مجموعة متنوعة من الماسكات الطبيعية...
وده لأن الماسكات الطبيعية من أهم مستحضرات التجميل اللي لها مفعول السحر في الاعتناء بالبشرة، فالماسكات لها فوائد كثيرة، منها؛ أنها بتساعد على جريان الدورة الدموية، وإزالة المواد السامة من على البشرة الخارجية، ومعالجة تجاعيد البشرة، وإزالة الدهون والزيوت من على البشرة...
مش كده وبس دي كمان بتخلي البشرة الجافة رطبة والبشرة الدهنية عادية، وبتدخل الأكسجين إلى البشرة وبتخلي البشرة منتعشة ومرتاحة...
ودلوقتي تعالي نشوف مجموعة متنوعة من الماسكات الطبيعية، وياريت تختاري ماسك واحد منهم مناسب لنوع بشرتك وتعمليه مرة واحدة في الأسبوع.



ماسك اللبن
للبشرة العادية
الماسك ده بالذات مناسب جدا لأصحاب البشرة العادية، لأنه بينقي البشرة من أي شوائب ممكن تتجمع عليها نتيجة التلوث وكمان بيغذيها.

المكونات:-

• 5 معالق لبن حليب.
• 5 معالق عسل نحل.


طريقة تحضير الماسك:-
حطي العسل على اللبن، لغاية ما يصبحوا مزيجا واحدا، وبعدين حطي الماسك على وجهك لمدة 10 دقائق، بعد كده اغسلي وجهك بالميه الفاترة.


غسول النعناع
للبشرة الدهنية
لو كانت بشرتك دهنية فأنت أكيد محتاجة إلى حاجة تخلصك من الدهون والزيوت... وأحسن حاجة إنك تستخدمي غسول النعناع

المكونات:-

• نعناع أخضر أو مجفف.
• ميه.

طريقة تحضير الماسك:-
بتغلي شوية نعناع طازة مع الميه، وبعدين تستني شوية لما الميه دي تبرد، وبعد كده تغسلي وجهك بيهم مرتين في اليوم مرة الصبح ومرة بالليل.


ماسك عصير الخيار
للبشرة الدهنية الجافة
الماسك ده ممكن تستخدميه لو كانت بشرتك دهنية جافة بس بشرط إنها تكون خالية من الحبوب...

المكونات:

• معلقتين عصير خيار.
• معلقة ماء ورد.
• معلقة زيت زيتون.
• معلقتين دقيق.
• شرائح خيار.


طريقة تحضير الماسك:-
بتخلطي المكونات كلها مع بعضها ما عدا شرائح الخيار، وبتحطي الماسك على بشرتك، وبتحطي شرائح الخيار عليه لمدة 10 دقائق، بعد كده بتغسلي وجهك بالميه الباردة، على فكرة الماسك ده بيساعد على ترطيب البشرة.


ماسك التفاح
لشد البشرة الدهنية المترهلة
لو كنت فوق الثلاثين وبتعاني من وجود ترهلات في بشرتك ممكن تستعملي الماسك ده...

المكونات:-

• قلب التفاحة.
• معلقة كبيرة نشا مدوبة في معلقتين ميه.
• 3 معالق عصير تفاح.
• معلقة كبيرة عصير خس.
• نقطتين عصير ليمون.
• معلقتين كبار دقيق.

طريقة تحضير الماسك:-
بتحطي التفاحة بعد ما تقشريها في الخلاط، وبتضيفي إليها كل المكونات السابقة، وفي الآخر الدقيق واحدة واحدة لغاية ما الخليط يتماسك في الخلاط، بتحطي الماسك على وشك لمدة 10 دقايق وبتشيليه بالميه الفاترة، وعلى فكرة ده مش بيشد البشرة وبس ده كمان بيشيل البقع الموجودة في الوجه.


ماسك الليمون
لسد مسام البشرة الدهنية
لو كانت بشرتك دهنية وبتعاني من مشكلة المسام الواسعة فالحل في الماسك ده...


المكونات:-
• 3نقط عصير ليمون.
• معلقة كبيرة خميرة مدوبة في معلقتين ميه.
• معلقة نشا مدوبة مع معلقة ماء ورد.
• معلقتين لبن.

طريقة تحضير الماسك:-
بتحطي المكونات كلها مع بعضها لغاية ما يبقوا مزيج متماسك، ولو المزيج ناشف شوية ممكن تحطي شوية لبن، ولو المزيج طري بتحطي شوية دقيق...

بتحطي الماسك على بشرتك لمدة 5 دقائق، وبعد كده بتشيليه بالميه الفاترة، على فكرة الماسك ده بينظف البشرة وبيسد المسام الواسعة في منطقة الأنف أو الخدود وبيخفف الإفرازات الدهنية في الخدود.

ماسك عصير البرتقال
للبشرة الجافة
لو كانت بشرتك جافة ونفسك في حاجة تطريها يبقى ممكن تجربي الماسك ده...


المكونات:-

• معلقة كبيرة قشر ليمون مبشور.
• معلقة كبيرة قشر برتقال مبشور.
• معلقة دقيق.
• معلقة صغيرة عصير ليمون.
• معلقة صغيرة عصير برتقال.
• معلقة صغيرة زيت اللوز الحلو "موجود عند العطار".

طريقة تحضير الماسك:-
تخلطي المكونات كلها مع بعضها وتفركي وشك بيها، وعلى فكرة ممكن تغسلي وشك بالصابون الطبي في الأول، وبعدين تفركي وشك بالماسك بإيدك الاثنين بالراحة، وعلى فكرة الماسك ده مفيد جدا لأنه بيقضي على أي خلايا ميتة في البشرة، وممكن بعد الماسك ده تحطي على وشك قشطة اللبن لمدة 3 دقايق..


ماسك زيت الزيتون
للبشرة الجافة شديدة الجفاف
لو كانت بشرتك جافة وشديدة الجفاف فالحل إنك تستخدمي الماسك البسيط ده...


المكونات:-

• معلقة كبيرة زيت زيتون.
• معلقة كبيرة جلسرين أو فازلين طبي.
• معلقة كبيرة خميرة مدوبة في معلقتين لبن دافئ.
• 3 معالق دقيق.

طريقة تحضير الماسك:-
بتحطي الفازلين مع الزيت، وبتحطي عليهم الخميرة مع اللبن، بتزودي شوية دقيق مع اللبن لغاية ما يبقى المزيج متماسك، بتحطي الماسك على وشك لمدة ربع ساعة، وبعد كده بتغسلي وشك بالميه الفاترة.
ماسك بياض البيض
للبشرة المختلطة اللي بتميل إلى الدهنية
المكونات:

• بياض بيضة.
• 1/2 معلقة صغيرة عصير ليمون.
• معلقة كبيرة من البطاطس المسلوقة والمهروسة كويس.
• معلقة صغيرة عسل نحل.
• معلقة كبيرة نشا مدوبة في ماء ورد.


طريقة تحضير الماسك:-
بتحطي بياض البيضة في الخلاط، وبعدين بتضيفي إليه كل المكونات وتخلطيهم مع بعض كويس، هتحطي الماسك على وجهك لمدة 7 أو 8 دقائق، وبعدين هتغسلي وجهك بالميه الفاترة...
على فكرة الماسك ده هيساعد البشرة المختلطة على إنها تبقى عادية وما تبقاش دهنية..


ماسك بشر الصابون الطبي
للبشرة المختلطة
المكونات:-

• معلقة صابون طبي مبشور.
• 1/2 معلقة زيت زيتون.
• نصف كوباية ماء ورد.


طريقة تحضير الماسك:-
هتخلطي كل المكونات دي مع بعض، وهتفركي بيها وجهك كل يوم ، وبعد كده تغسلي وجهك بالميه الفاترة، على فكرة الماسك ده بينعش البشرة جدا وبينقيها.

دي كمان مجموعة من الماسكات مناسبة لكل أنواع البشرة...

ماسك قبل الماكياج
ده ماسك ممكن تحطيه قبل الماكياج وعلى فكرة الماسك ده بيشيل الشحوب والتجاعيد والاصفرار وبيعطي نضارة للبشرة....

المكونات:-
• صفار بيضة.
• نقطتين زيت لوز حلو.
• نقطتين عصير ليمون.
• نقطتين عصير برتقال.
• 1/2 معلقة صغيرة ماء ورد.
• 1/2 معلقة صغيرة ماء زهر.
• معلقة صغيرة عسل نحل.
• بشر قشرة ليمونة.
• معلقة صغيرة زبدة أو معلقة كبيرة قشطة لبن.
• معلقة كبيرة دقيق.
• 1/2 فنجان لبن سايل.

طريقة تحضير الماسك:-
بتحضري الماسك على مرحلتين:
1. بتخفقي صفار البيضة مع الزيت وعصير الليمون والبرتقال، وبعدين تزودي عليهم ماء الورد وماء الزهر وتحطي العسل وبشر الليمون..
2.هتسخني قطعة الزبدة أو قطعة القشطة على النار وتضيفي عليها الدقيق زي طريقة الصوص الأبيض وبعدين تحطي شوية لبن لغاية ما يبقى لزج زي الزبادي.
بتخلطي مزيج المرحلة الأولى مع مزيج المرحلة الثانية، ممكن إنك تقسمي الماسك على 3 أو 4 أقسام وتحطيهم في الثلاجة، وتطلعي منهم على حسب ما أنت عايزاه، وبعدين تحطي الماسك على وشك لمدة ربع ساعة، وبعد كده بتشيليه بالمياه الفاترة..


ماسك لشد التجاعيد والترهلات
لو كنت بتعاني من مشكلة ظهور التجاعيد أو الترهلات فالحل في الماسك ده...

المكونات:-
• بشر تفاحة.
• معلقة نشا مدوبة في معلقتين لبن ساقع.
• نقطتين زيت زيتون.
• معلقة كبيرة دقيق.

طريقة تحضير الماسك:-

بتخلطي المكونات دي كلها مع بعض، وممكن تحطي شوية لبن لو كان الخليط سميك شوية، وبتحطي الماسك على وجهك لمدة 10 دقايق وبعد كده تغسليه بميه ساقعة جدا.
ماسك النشا
لعلاج السواد تحت العين
أما لو كنت بتعاني من مشكلة الهالات السوداء فالحل في الماسك ده...


المكونات:-
• معلقة كبيرة نشا.
• معلقة كبيرة ماء ورد.
• معلقة كبيرة خميرة.
• معلقة كبيرة لبن فاتر.
• نقطتين زيت لوز.
• معلقة كبيرة عصير الخيار.

طريقة تحضير الماسك:-
بتخلطي المكونات دي كلها مع بعضها كويس أوي، وبتجيبي قطعة شاش من الصيدلية، وبتحطي فيها الماسك ده، وبعدين بتحطيه على عينيك لمدة 10 دقائق، بعد مرور العشرة دقائق بتشيلي قطعة الشاش، وبعدين بتغسلي عينك بالميه الباردة....ممكن بعد ما تخلصي الماسك ده تحطي كريم مرطب حول العين.

ماسك التفاح
لتفتيح الرقبة
لو كنت بتعاني من مشكلة اسمرار منطقة الرقبة، فدي وصفة هايلة هتساعدك على التفتيح..

المكونات:-
• بشر تفاحة طازجة.
• معلقة كبيرة دقيق.
• نقطتين عصير ليمون.
طريقة تحضير الماسك:-
بتخلطي التفاحة المبشورة مع الدقيق وعصير الليمون، وبعد كده بتحطي الماسك على رقبتك لمدة 10 دقائق، وبتشيليه بالميه الفاترة، على فكرة الماسك ده مش بس بيفتح الرقبة وبس ده كمان بيشد عضلات الرقبة.